នាយឧត្តមសេនីយ ស៊ុំ សំណាង ពិនិត្យការប្រមូលផលស្រូវនៅកងពលធំលេខ ៣
កាលពីសប្ដាហ៍កន្លងទៅនេះ ក្រុមការងារចម្រុះរបស់ក្រសួងការពារជាតិ និងក្រសួងសេដ្ឋកិច្ច-ហិរញ្ញវត្ថុបានចុះត្រួតពិនិត្យនិងចូលរួមច្រូតកាត់ ប្រមូលផលស្រូវលើដីដាំដុះរបស់កងទ័ពនិងគ្រួសារនៅកងពលធំលេខ ៣។
ក្នុងឱកាសនោះ នាយឧត្តមសេនីយ ស៊ុំ សំណាង អគ្គនាយកភស្តុភារ-ហិរញ្ញវត្ថុ ក្រសួងការពារជាតិកម្ពុជា និងឧត្តមសេនីយឯក ស្រី ឌឹក បានស្វែងយល់អំពីស្ថានភាពបង្កបង្កើនផលសម្រាប់ឆ្នាំនេះ។
ក្នុងឆ្នាំនេះ ជាទូទៅ ស្រូវមានទិន្នផលល្អបង្គួរ ប៉ុន្តែនៅតំបន់ខ្លះ ស្រូវបានស្កកដោយសារមិនមានទឹកគ្រប់គ្រាន់។ ទោះយ៉ាងណា គ្រួសារកងទ័ពនៅតែអាចប្រមូលផលបានគ្រប់គ្រាន់សម្រាប់ទូទាត់ថ្លៃចំណាយ និងលើកកម្ពស់គុណភាពនៃការហូបចុក ព្រមទាំងលក់យកប្រាក់ទូទាត់រំលោះប្រាក់កម្ចីទុនវិនិយោគតាមកិច្ចសន្យា។
ឯកឧត្តម វង្សី វិស្សុត រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងឧត្តមសេនីយឯក ហ៊ុន ម៉ាណែត អគ្គមេបញ្ជាការរងកងទ័ពជើងគោក បានចាត់ចែងឲ្យមានការខ្ចីទុនស្រូវបន្ថែមទៀតដើម្បីពន្លឿនវិសាលភាពនៃការផលិតស្រូវរបស់កងទ័ពនិងគ្រួសារកងទ័ព។